12 ýaşa çenli oglanlaryň we gyzlaryň arasynda Merkezi Aziýa tennis çempionaty Fergana şäherinde başlandy we ýaryşyň ilkinji gününde türkmen tennisçileri ýeňip bolmajak bäsdeş hasaplanýan Özbegistan toparyndan üstün çykdylar. Bu barada "Türkmenistan: Altyn asyr" elektron gazeti habar berýär.

Ýekelikdäki geçen ilkinji duşuşykda Sülgün Işangulyýewa (Türkmenistan) 6:2, 6:0 hasabynda Odina Hakimowany (Özbegistan) ynam bilen ýeňdi. Näzli Hudaýgulyýewa (Türkmenistan) ýekelikdäki erjellikli geçen ikinji duşuşykda Milana Zaharowadan (Özbegistan) ýeňildi - 5:7, 2:6. Aýgytly jübütleýin duşuşykda türkmen topary Sülgün Işangulyýewa / Sähra Garahanowa Laýlo Tuhtamişewany / Milana Zaharowany 6:3, 6:0 hasabynda ýeňdiler.

Şeýlelikde, Türkmenistan topary ýer eýeleri hökmünde çykyş edýän we ýaryşyň ökde toparlarynyň biri bolan özbek tennisçilerinden 2:1 hasabynda umumy ýeňiş gazandylar. Bu ýeňiş Aziýa çempionatynyň - ATF 12U toparlaýyn bäsleşiginiň final tapgyryna çykmak üçin ähmiýetli bildiriş boldy.

Indiki tapgyrda türkmen tennisçileri birinji tapgyrda Gyrgyzystan toparyndan 3:0 hasabynda üstün çykan Gazagystanyň topary bilen duşuşarlar.