Aşgabat şäherinde Türkmenistanyň klub toparlarynyň arasynda milli woleýbol çempionatynyň I tapgyry tamamlandy.

Bu çempionata toparlaryň 11-si gatnaşyp, olar iki toparçada özara bäsleşdiler.

Gyzykly geçen oýunlaryň netijesinde, Türkmenistanyň Içeri işler ministrliginiň «Galkan» woleýbol topary 12 utuk toplap birinjiligi eýeledi.

Ýaryşyň ikinji ornuny 10 utuk jemlemegi başaran toparlar TDBGI-niň «Binagär» topary, Türkmen döwlet Bedenterbiýe we sport institutynyň «Talyp sport» woleýbol topary paýlaşdylar.

Türkmenistanyň Migrasiýa gullugynyň «Migrasiýa» toparynyň woleýbolçylary bary-ýogy 1 utuk tapawut bilen, ýagny 9 utugy jemläp çempionatda üçünjiligi eýelediler.

Magtymguly adyndaky Türkmen döwlet uniwersitetiniň «Galkynyş» topary 8 utuk, Türkmen döwlet maliýe institutynyň «Maliýeçi» topary 7 utuk, Türkmenistanyň Goranmak ministrliginiň «Milli Goşun» topary 5 utuk, «Watançy» 5 utuk, Türkmenistanyň Ulag we telekommunikasiýalar institutynyň «Kerwen» topary 1 utuk bilen ýaryş jedwelinden orun aldylar.

Milli çempionatyň II tapgyry 2019-njy ýylyň 16-22-nji dekabr aralygynda Aşgabat şäherinde geçiriler.

Şirin ŞIRLIÝEWA,

žurnalist.